EPFO चा मोठा दिलासा! हरवलेले जुने PF खाते आता काही मिनिटांत शोधता येणार; ‘EPFO 2.01’ ची नवी सुविधा सुरू

नवी दिल्ली : कर्मचारी भविष्य निर्वाह निधी संघटनेने (EPFO) आपल्या कोट्यवधी सदस्यांसाठी आणखी एक महत्त्वाची सुविधा सुरू केली आहे. EPFO 2.01 या नव्या प्लॅटफॉर्ममुळे आता अनेक वर्षांपूर्वीचे हरवलेले किंवा सध्याच्या UAN शी लिंक न झालेले PF खाते शोधणे अधिक सोपे होणार आहे. नोकरी अनेक वेळा बदललेल्या कर्मचाऱ्यांसाठी हा बदल विशेषतः फायदेशीर ठरणार आहे.

यापूर्वी अनेक कर्मचाऱ्यांना जुने PF खाते किंवा Member ID शोधण्यासाठी कार्यालयांचे फेरे मारावे लागत होते. काही प्रकरणांमध्ये आवश्यक माहिती उपलब्ध नसल्याने PF हस्तांतरण किंवा पैसे काढण्यासही विलंब होत होता. मात्र, EPFO 2.01 प्लॅटफॉर्ममधील नव्या सुविधेमुळे ही प्रक्रिया आता अधिक सुलभ करण्यात आली आहे.

सेवा इतिहास एका क्लिकवर

नवीन सुविधेमध्ये सदस्यांना Service History पाहण्याचा पर्याय देण्यात आला आहे. या माध्यमातून कर्मचारी आपल्या सर्व नोकऱ्यांचा सेवा इतिहास, जुने Member ID, विविध संस्थांमधील रोजगाराचा तपशील आणि PF खात्यांची माहिती एकाच ठिकाणी पाहू शकतात. त्यामुळे जुने खाते ओळखणे आणि ते सध्याच्या UAN शी जोडणे अधिक सोपे होणार आहे.

कोणाला होणार सर्वाधिक फायदा?

ज्या कर्मचाऱ्यांनी UAN प्रणाली सुरू होण्यापूर्वी विविध कंपन्यांमध्ये काम केले आहे, तसेच अनेक वेळा नोकरी बदलल्यामुळे वेगवेगळे Member ID तयार झाले आहेत, अशा सदस्यांना या सुविधेचा मोठा लाभ मिळणार आहे. याशिवाय जुने PF खाते विसरलेल्या कर्मचाऱ्यांनाही त्यांची रक्कम शोधणे आणि पुढील प्रक्रिया पूर्ण करणे सोपे होईल.

जुने खाते दिसत नसेल तर काय कराल?

जर Service History मध्ये जुने PF खाते दिसत नसेल, तर संबंधित जुन्या नियोक्त्याशी संपर्क साधून Member ID आणि इतर तपशीलांची पडताळणी करावी. नाव, जन्मतारीख किंवा इतर माहितीमध्ये तफावत असल्यास ती दुरुस्त केल्यानंतर खाते दिसू शकते.

डिजिटल सेवांकडे EPFO चे आणखी एक पाऊल

EPFO सातत्याने आपल्या सेवा अधिक डिजिटल आणि सुलभ करण्यावर भर देत आहे. EPFO 2.01 प्लॅटफॉर्ममधील ही सुविधा सुरू झाल्यामुळे PF खाते शोधणे, सेवा इतिहास तपासणे, खाते हस्तांतरण आणि भविष्यातील क्लेम प्रक्रिया अधिक वेगवान आणि पारदर्शक होण्याची अपेक्षा व्यक्त केली जात आहे.