मुंबई : Maharashtra Cabinet Decisions : राज्य मंत्रिमंडळाच्या दि. 21 जुलै रोजी झालेल्या बैठकीत विविध विभागांशी संबंधित 5 महत्त्वाचे निर्णय घेण्यात आले. शिक्षण, आपत्ती व्यवस्थापन, महसूल, नियोजन आणि लोकायुक्त कार्यालयाच्या बळकटीकरणाशी संबंधित या निर्णयांना मंत्रिमंडळाने मंजुरी दिली आहे.
नागपूरमध्ये शासकीय उद्यानविद्या महाविद्यालयाला मंजुरी
राज्यात उद्यानविद्या शिक्षणाला चालना देण्यासाठी नागपूर जिल्ह्यात शासकीय उद्यानविद्या महाविद्यालय स्थापन करण्यास मंत्रिमंडळाने मंजुरी दिली. या महाविद्यालयासाठी 51 नियमित पदांनाही मान्यता देण्यात आली असून विद्यार्थ्यांना आधुनिक उद्यानविद्या शिक्षणाची सुविधा उपलब्ध होणार आहे.
एनडीआरएफसाठी पुणे जिल्ह्यात जमीन
राष्ट्रीय आपत्ती प्रतिसाद दल (NDRF) अधिक सक्षम करण्याच्या उद्देशाने पुणे जिल्ह्यातील सदुंबरे येथे 3 हेक्टर जमीन उपलब्ध करून देण्यास मंजुरी देण्यात आली. या निर्णयामुळे आपत्ती व्यवस्थापनाची क्षमता वाढण्यास मदत होणार आहे.
महसूल विभागाचा महत्त्वाचा निर्णय
महसूल विभागाच्या प्रस्तावानुसार मोझरी येथील अखिल भारतीय श्रीगुरुदेव सेवामंडळाच्या नागपूरमधील सुभाष रोड येथील जागेच्या भाडेपट्टा नूतनीकरणावरील मुद्रांक शुल्क माफ करण्यास मंत्रिमंडळाने मान्यता दिली.
177 आकांक्षित तालुक्यांसाठी विशेष कार्यक्रम
राज्यातील 177 आकांक्षित तालुक्यांमध्ये सन 2026-27 या वर्षासाठी प्रायोगिक तत्त्वावर ‘आकांक्षित तालुका कार्यक्रम’ राबविण्यास मंजुरी देण्यात आली. या उपक्रमातून विकासाच्या विविध निर्देशांकांमध्ये सुधारणा करण्यावर भर दिला जाणार आहे.
लोकायुक्त कार्यालयाचा सुधारित आकृतीबंध मंजूर . Maharashtra Cabinet Decisions
लोकायुक्त कार्यालयाचे कामकाज अधिक प्रभावी करण्यासाठी 143 पदांच्या सुधारित आकृतीबंधाला मंत्रिमंडळाने मंजुरी दिली आहे. या निर्णयामुळे कार्यालयाची प्रशासकीय क्षमता अधिक मजबूत होण्याची अपेक्षा आहे.
एकाच बैठकीत 5 महत्त्वाचे निर्णय
21 जुलैच्या मंत्रिमंडळ बैठकीत घेतलेल्या या निर्णयांमुळे शिक्षण, प्रशासन, आपत्ती व्यवस्थापन, महसूल आणि विकास नियोजन या क्षेत्रांना चालना मिळणार असून राज्याच्या विकास प्रक्रियेला बळकटी मिळेल, अशी अपेक्षा व्यक्त करण्यात येत आहे.